Ushtruesja e detyrës së presidentes së Republikës së Kosovës, Albulena Haxhiu, ka vizituar sot delegacionin kosovar që po merr pjesë në Lojërat Mesdhetare Taranto 2026, duke përcjellë nga afër edhe ndeshjen e volejbollisteve kosovare kundër Algjerisë, e cila u mbyll me fitoren e Kosovës.
Haxhiu për KosovaPress, ka theksuar se Kosova po merr pjesë për herë të parë me delegacionin më të madh në historinë e saj në Lojërat Mesdhetare, me 163 sportistë në 21 sporte. Ajo ka përgëzuar volejbollistet për fitoren dhe u ka bërë thirrje të gjithë sportistëve që të japin maksimumin në garat që i presin.
“Republika e Kosovës për herë të parë ka ekipin më të madh që ka pasur ndonjëherë, pra me 163 me 21 sporte. Dhe sot erdhëm këtu për ta parë një lojë të jashtëzakonshme të vajzave, volejbollisteve tona, ku arritën fitore dhe unë i urova ato, shumë suksese në ditët që i kanë para vetes. Dhe kërkova nga ato që ta japin më të mirën nga vetja, sikurse edhe sportistët e tjerë. Jam shumë e bindur, duke i njohur shumë prej sportistëve tanë, sukseset e tyre kudo në botë, por edhe në Republikën e Kosovës, që do të kthehen me shumë medalje në Republikën e Kosovës”, theksoi Haxhiu për KosovaPress.
Ajo ka veçuar xhudon dhe karatenë si dy prej sporteve prej të cilave pret medalje, por ka bërë të ditur se shpresat janë edhe te disiplinat e tjera ku garojnë sportistët kosovarë.
“Xhudo, karate, sigurisht që presim më shumë medalje, por edhe prej sporteve të tjera. Për neve ka shumë rëndësi që jemi pjesëmarrës dhe jemi shumë të bindur pikërisht për shkak të këtij suksesi që do të korrim fitore dhe do të sjellim medalje në Republikën e Kosovës. I uroj më të mirat ekipit të Republikës së Kosovës. Sonte do të jemi atje në hapjen zyrtare të lojërave mesdhetare. Siç e dini, Republika e Kosovës do të jetë nikoqire në 2030-ën të Lojërave Mesdhetare, prandaj edhe po bëjmë të pamundurën që gjithçka të shkojë më mirë e mbarë”, u shpreh Haxhiu.
U.d. e presidentes së Kosovës ka thënë se prania pranë sportistëve në Taranto po ia mundëson që për një moment, të shkëputen nga zhvillimet politike në Kosovë.
“Asnjëherë nuk mund të shkëputemi nga zhvillimet në Republikën e Kosovës, si do që të jetë. Është moment i rëndësishëm për Republikën e Kosovës që jemi këtu dhe përpiqemi maksimalisht që të jemi sa më afër sportistëve tanë. E ndoshta kjo na bën që të shkëputemi pak nga zhvillimet aktuale politike”, deklaroi tutje Haxhiu.
Në fund, Haxhiu ka marrë si shembull sportistët kosovarë dhe sukseset e tyre, duke bërë thirrje për bashkim edhe në politikë, në mënyrë që të tejkalohet ngërçi aktual institucional.
“Mund të marrim shembuj të mirë. Kemi fat që Republika e Kosovës ka sportistë shumë të mirë dhe shumë herë, sidomos në lojëra të ndryshme, në sporte të ndryshme, kur ka bashkim, edhe korren sukseset, pra ka fitore. Prandaj po uroj që me të njëjtin mesazh të jemi edhe në politikë, bashkim në mënyrë që ta zgjedhim ngërçin që për momentin e kemi”, tha në fund Haxhiu.
Kosova po merr pjesë në Taranto 2026 me delegacionin më të madh të saj në histori në Lojërat Mesdhetare, ndërsa vendi do të jetë nikoqir i edicionit të vitit 2030, që do të zhvillohet në Prishtinë.
