Ushtruesja e Detyrës së Presidentes së Kosovës, Albulena Haxhiu, ka pritur në Kuvend një grup të rinjsh nga fusha të ndryshme, me rastin e Ditës Ndërkombëtare të Rinisë.
Duke iu drejtuar të rinjve, Haxhiu tha se vizita në Kuvend nuk duhet të shihet vetëm si një takim institucional, por edhe si mundësi që ata të sjellin zërin, idetë dhe vizionin e tyre në një hapësirë ku merren vendime që ndikojnë në jetën e qytetarëve.
Ajo theksoi se të rinjtë e pranishëm vijnë nga fusha të ndryshme, përfshirë teknologjinë, muzikën, teatrin, filmin, sportin, biznesin dhe akademinë, por sipas saj, i bashkon përkushtimi për të krijuar dhe ndërtuar.
Haxhiu u është drejtuar veçanërisht të rinjve nga mërgata, duke thënë se largësia nuk e zbeh lidhjen e tyre me Kosovën. Sipas saj, kontributi i tyre përmes punës, suksesit, gjuhës, kulturës dhe angazhimit vazhdon të jetë i rëndësishëm për vendin.
U.D. Presidentja tha se institucionet dhe shoqëria kanë përgjegjësi për t’u krijuar të rinjve mundësi që potencialin e tyre ta shndërrojnë në sukses.
“Brezi juaj e ka një detyrë ta bëjë këtë liri mundësi reale për secilin të ri, që dëshiron të mësojë, të punojë, të krijojë dhe të ndërtojë të ardhmen e tij këtu”, ka deklaruar Haxhiu.
Ajo ka theksuar nevojën për një Kosovë ku të rinjtë kanë qasje në arsim cilësor, punë të ndershme dhe mundësi për zhvillim profesional, pa qenë të detyruar të largohen nga vendi për të realizuar potencialin e tyre.
Në fund, Haxhiu i ka inkurajuar të rinjtë të mos heqin dorë nga idetë e tyre dhe të kërkojnë më shumë nga institucionet, shoqëria dhe vetja.
