Kryetarja e Kuvendit të Kosovës, Albulena Haxhiu, ka deklaruar se ndonëse në një demokraci parlamentare janë të zakonshme dallimet e thella politike dhe debatet e ashpra, ekziston një vijë që nuk duhet të kalohet: respektimi i rendit kushtetues.
Ajo ka theksuar se mungesa e partive opozitare në seancën e Kuvendit, ku po diskutohet për zgjedhjen e presidentit të vendit, sjell pasoja të drejtpërdrejta për funksionimin e institucioneve.
“Në një demokraci parlamentare mund të ketë dallime të thella politike, përplasje, debate, madje edhe mosmarrëveshje të forta, por unë mendoj se ekziston një vijë që nuk duhet kaluar, dhe kjo vijë është detyrimi ynë i të gjithëve për ta respektuar rendin kushtetues. Mungesa e opozitës në seancë është një veprim që prodhon pasoja direkte, duke bllokuar një procedurë kushtetuese dhe duke e shtyrë vendin drejt një krize të panevojshme”, është shprehur Haxhiu.
Ajo ka shtuar se nuk synon të gjykojë motivet politike të partive opozitare, por e konsideron obligim të saj mbrojtjen e funksionimit kushtetues të Kuvendit.
Sipas Haxhiut, aktgjykimi i Gjykatës Kushtetuese e ka sqaruar qartë këtë çështje, duke theksuar se deputetët janë të obliguar të jenë të pranishëm dhe të votojnë, përveç rasteve kur kanë marrë leje të rregullt paraprake.
“Nuk jam këtu për të gjykuar motivet politike të askujt, por është detyrimi im që të mbroj funksionimin kushtetues të këtij institucioni, sepse aktgjykimi i Gjykatës Kushtetuese e ka sqaruar këtë çështje në mënyrë përfundimtare. Deputetët janë të obliguar të jenë të pranishëm dhe të votojnë, përveç rasteve kur kanë marrë leje paraprake të rregullt”, ka deklaruar Haxhiu.
Haxhiu, gjithashtu ka sqaruar se arsyeja pse nuk ka vazhduar seancën e nisur më 5 mars për zgjedhjen e presidentit është se ka ditur paraprakisht qëndrimet politike të subjekteve opozitare lidhur me bojkotin e seancës për zgjedhjen e presidentit./teve1.info/
