U.d. presidentja e Kosovës, Albulena Haxhiu, ka uruar Inspektoratin Policor të Kosovës (IPK) me rastin e 20-vjetorit të themelimit, duke vlerësuar rolin e këtij institucioni në garantimin e llogaridhënies dhe forcimin e besimit të qytetarëve në Policinë e Kosovës.
Përmes një postimi në Facebook, Haxhiu tha se IPK ka kryer një mision thelbësor për funksionimin e një shteti demokratik.
“Për 20 vjet, Inspektorati Policor i Kosovës ka kryer një mision që rrallë është në qendër të vëmendjes, por që është thelbësor për një shtet demokratik: të kujdeset që ata të cilët e mbrojnë qytetarin të mbeten vetë brenda ligjit”, ka shkruar Haxhiu.
Ajo theksoi se puna e Inspektoratit gjatë dy dekadave ka dëshmuar se transparenca dhe llogaridhënia nuk e dobësojnë Policinë e Kosovës, por e bëjnë atë më të besueshme në sytë e qytetarëve.
“Përgjatë këtyre dy dekadave, Inspektorati ka dëshmuar se llogaridhënia dhe transparenca nuk e dobësojnë Policinë e Kosovës, por e forcojnë besimin e qytetarëve në të”, ka deklaruar ajo.
Sipas Haxhiut, rritja e numrit të qytetarëve që i drejtohen IPK-së është tregues i besimit që ky institucion ka fituar ndër vite.
“Rritja e numrit të qytetarëve që i drejtohen Inspektoratit është dëshmi se ky institucion po shihet gjithnjë e më shumë si një adresë e besueshme për drejtësi, ku çdo ankesë trajtohet me profesionalizëm”, ka theksuar ajo.
Në përfundim, Haxhiu u shprehu mirënjohje të gjithë atyre që kanë kontribuar në ndërtimin dhe forcimin e IPK-së, duke bërë thirrje që edhe në të ardhmen institucioni të mbetet i përkushtuar ndaj pavarësisë, integritetit dhe profesionalizmit.
“Njëzet vitet e ardhshme le të jenë vazhdim i të njëjtit përkushtim për pavarësi, integritet dhe profesionalizëm, sepse një shtet bëhet i fortë vetëm atëherë kur ka guximin të jetë i drejtë me vetveten”, ka shkruar Haxhiu.
