Përfaqësues të platformës “Liria ka Emër” kanë zhvilluar takim me kryetaren e Kuvendit të Kosovës, Albulena Haxhiu, lidhur me organizimin e marshit qytetar që do të mbahet më 17 Shkurt në Prishtinë.
Sipas njoftimit të platformës, në takim është diskutuar për marshin me moton “Drejtësi, jo politikë”, i cili synon të shprehë mbështetje për ish-krerët e UÇK-së – Hashim Thaçi, Kadri Veseli, Jakup Krasniqi dhe Rexhep Selimi – të cilët po përballen me gjykim në Hagë për krime lufte.
Në komunikatë thuhet se është theksuar rëndësia e një mobilizimi dinjitoz qytetar në këtë fazë të procesit gjyqësor.
Sipas platformës, Haxhiu ka vlerësuar angazhimin e tyre dhe ka përgëzuar organizimin e marshit, duke theksuar rëndësinë e unitetit kur bëhet fjalë për vlerat e luftës çlirimtare.
Marshi pritet të mbahet më 17 shkurt në sheshin “Skënderbeu” në Prishtinë, në përvjetorin e Pavarësisë së Kosovës.
