Kryetarja e Kuvendit të Kosovës, Albulena Haxhiu, ka reaguar lidhur me themelimin e grupit punues për ish-krerët e UÇK-së.
Ajo, ka bërë të ditur se në mbledhjen e ardhshme të Kryesisë së Kuvendit do të propozojnë delegimin e një përfaqësuesi të Kryesisë në këtë grup punues.
“Kuvendi do të jetë pjesë e këtij angazhimi. Në mbledhjen e ardhshme të Kryesisë, do të propozojmë delegimin e një përfaqësuesi të Kryesisë në këtë Grup Punues, në funksion të kontributit institucional për një mbrojtje sa më të mirë në procesin e Apelit”, tha Haxhiu.
Ajo më tej ka thënë se e mirëpret themelimin e këtij grupi punues.
“Mirëpres vendimin e Qeverisë për themelimin e Grupit Punues, i cili do të bashkërendojë mbështetjen shtetërore për ish-krerët e UÇK-së në procesin e Apelit”, u shpreh Haxhiu.
Haxhiu e cilësoi aktgjykimin e 16 shtatorit si të pasaktë dhe të padrejtë, duke shtuar se në këtë fazë është thelbësore të ketë një strategji të përbashkët shtetërore.
“Aktgjykimi i 16 shtatorit ishte i padrejtë dhe i pasaktë. Në këtë fazë, është thelbësore që procesi në Apel të mbështetet nga një strategji e përbashkët shtetërore, me angazhim të koordinuar dhe mbështetje të plotë institucionale”, tha tutje Haxhiu.
