Ushtruesja e detyrës së presidentes së Kosovës, Albulena Haxhiu ka kujtuar në 27-vjetorin e zhdukjes me forcë të veprimtarit dhe intelektualit shqiptar, Ukshin Hoti.
Ajo ka vlerësuar Hotin si një nga figurat më të rëndësishme të mendimit politik shqiptar, duke theksuar kontributin e tij në artikulimin e kërkesës për Republikën e Kosovës.
“Sot bëhen 27 vjet nga zhdukja me forcë e Prof. Ukshin Hotit, intelektualit të Republikës, mendimtarit politik dhe veprimtarit të çështjes kombëtare.
Ukshin Hoti ishte ndër zërat më të qartë të mendimit politik shqiptar, që kërkesën për Republikën e Kosovës e artikuloi me dije, guxim dhe bindje të palëkundur. Për këtë, u burgos disa herë nga regjimi jugosllav dhe serb.
Më 16 maj 1999, pas daljes nga burgu i Dubravës, ai u zhduk nga aparati shtetëror serb.
Përderisa fati i Ukshin Hotit mbetet i pandriçuar, drejtësia për të zhdukurit me forcë mbetet e paplotë. E vërteta për të është detyrim ndaj familjes, ndaj historisë dhe ndaj Republikës që ai e mendoi para se ajo të bëhej shtet”, ka deklaruar Haxhiu./teve1.info/
