Ushtruesja e detyrës së Presidentes së Kosovës, Albulena Haxhiu, ka pritur në takim Drejtoreshën për Ballkanin Perëndimor në Komisionin Evropian, Valentina Superti, e cila po zhvillon vizitën e saj të parë zyrtare në Kosovë.
Gjatë takimit, Haxhiu e falënderoi Supertin për mbështetjen e vazhdueshme të Bashkimit Evropian ndaj Kosovës, duke theksuar se kjo mbështetje është reflektuar në forcimin e institucioneve demokratike, avancimin e reformave dhe orientimin e qartë evropian të vendit.
Ajo theksoi se Kosova mbetet plotësisht e harmonizuar me politikën e jashtme dhe të sigurisë së Bashkimit Evropian, ndërsa po zbaton me përkushtim obligimet që burojnë nga Agjenda e Reformave dhe Plani i Rritjes.
Sipas Haxhiut, progresi i arritur nga Kosova duhet të pasohet me një përgjigje të qartë politike nga Bashkimi Evropian, përmes avancimit drejt statusit të vendit kandidat dhe hapjes së negociatave për anëtarësim.
Në takim u diskutua edhe për zbatimin e marrëveshjeve të Procesit të Berlinit, si dhe për rëndësinë e një bashkëpunimi rajonal të barabartë, ku Kosova trajtohet në mënyrë të barabartë në përfaqësim, lidhje infrastrukturore, tregti, digjitalizim dhe qasje në iniciativat e tregut të përbashkët./teve1.info/
