Ministrja në detyrë e Drejtësisë, Albulena Haxhiu, ka thënë se ishin të gatshëm të ofronin zgjidhje që “të korrigjohet gabimi” në Kuvend me mosvotimin e raportit për verifikimin e mandateve.
Ajo ka thënë se nevojitet dakordim mes partive politike për të dalë nga bllokada, që sipas saj e ka shkaktuar opozita.
“Kryesuesi i seancës konstituive nuk mund të merr vendime kokë në vete prandaj edhe i ftoi në takim përfaqësuesit e partive politike. Pra duhet konsultim sepse duhet të kemi konsensus për rrugën që duhet ta ndjekim në mënyrë që të konstituojmë Kuvendin e Republikës së Kosovës. Vetëm kur ka dakordim ndërmjet partive, dalim nga bllokada e shkaktuar nga opozita. Qëndrimi ynë është që duhet të dakordohen partitë politike si të vazhdohet. Kur dakordohemi dhe e votojnë raportin, dalim nga bllokada”, ka shkruar ajo në Facebook.
Haxhiu ka thënë se opozita vazhdoi me avazin e vjetër të bllokimit dhe kërkesës së “stërvjetëruar” për dorëheqjet, të cilat thotë se i kanë adresuar me kohë.
“Nuk parashihet askund se çfarë ndodhë nëse nuk verfikohen mandatet prandaj duhet të ketë propozime nga partitë politike por opozita sot vazhdoi me avazin e vjetër të bllokimit dhe kërkesës së stërvjetëruar për dorëheqjet të cilat i kemi adresuar me kohë. Ne jemi të hapur për propozime që dërgojnë deri në konstituimin e Kuvendit por assesi nuk i pranojmë lojërat e opozitës dhe kërkesat absurde dhe që nuk mbështeten askund”, ka thënë ajo mes tjerash.
