Ministrja e Drejtësisë, Albulena Haxhiu, ka reaguar ndaj deklaratave të shefit të Grupit Parlamentar të PDK-së, Abelard Tahiri, i cili kërkoi përgjigje nga kryeministri i Kosovës, Albin Kurti dhe kryetarit të Kuvendit, Glauk Konjufca për humbjen dhe gjetjen e një pjese të mostrave të Astrit Deharit.
Lidhur me këtë, Haxhiu ka kërkuar që Tahiri të dëshmojë si dëshmitarë në Prokurorinë Speciale të Kosovës, pasi që ai tha se Kurti dhe Konjufca kanë pasur njohuri për zhdukjen e mostrave qysh në pranverën e vitit 2022, dhe jo në dhjetor të atij viti.
Haxhiu tha se për dyshimet e tij, ai le të dëshmojë, duke treguar se “a ka qenë ai i informuar apo edhe i përfshirë në atë mision të zhdukjeve të mostrave?”.
“Aludimi i tij në konferencën e djeshme për media, se Kryeministri dhe Kryetari i Kuvendit kanë qenë në njohuri për zhdukjen e mostrave të rastit Dehari, që në pranverën e vitit 2022, zgjon dyshimet e bazuara se mbase z.Tahiri ka qenë i informuar që prej asaj kohe”, ka shkruar ministrja në Facebook.
Tutje, ajo tha se dyshimet e tilla largojnë vëmendjen nga diku tjetër dhe asnjëherë për të hedhur dritë mbi të vërtetën.
