Ministrja e Drejtësisë, Albulena Haxhiu i ka dalur në mbrojte deklaratës së zëvendëskryeministrit, Besnik Bislimi drejtuar Bashkimit Evropian.
Haxhiu në emisionin” Info Nata” në Tëvë 1 tha se deklarata e Bislimit nuk ka qenë kërcënuese dhe se nuk e vlerëson si të rrezikshme.
“Unë mendoj që nuk është kërcënim, po ashtu vlerësoj se as nuk është deklaratë e rrezikshme, siç i kam dëgjuar, në përputhje me përgjegjësitë, në përputhje me kompetencat që i ka z.Bislimi. Konsideroj që është jashtëzakonisht e padrejtë presioni mbi Kosovën, veprimet ndaj Kosovës, përfshirë këtu edhe masat, e në anën tjetër një ledhatim i Serbisë për çka nuk i di arsyet përse ndodhin”, ka deklaruar ajo.
Tutje, ajo ka thënë se gjatë procesit të dialogut kanë parë anshmëri të ndërmjetësuesve dhe përkrahje të palës tjetër.
“Sigurisht se gjatë këtij procesi kemi parë një anshmëri për sa kohë ne kemi shkuar me propozime, me hapa konkretë, me ide konkrete dhe në anën tjetër ato nuk janë diskutuar, pra nuk janë shlyer përpara, por ka pasur momente kur është mbështetur pozicioni që ka pasur Serbia. Prandaj, ndërmjetësuesi duhet të këtë rol ndërmjetësues dhe jo të anojnë”, ka thënë ajo.
Ndryshe, Bislimi gjatë një interviste ka thënë se gjatë takimeve me ndërmjetësuesit ndërkombëtarë, kanë thënë që u kanë kërkuar të mos i detyrojnë ta eskalojnë situatën prapë.
“Ne kemi thënë, masat për deeskalim duhet të hiqen për shkak të deeskalimit, mos na detyroni ta eskalojmë situatën për t’iu treguar që e deeskalojmë prapë. Situata në veri ka deeskaluar, tregon që masat që janë vendosur për këtë nuk e kanë më bazën e tyre, rrjedhimisht është e palogjikshme të futen”, ka deklaruar Bislimi./teve1.info
