Ministrja e Drejtësisë, Albulena Haxhiu, do ta padis avokatin Besnik Berisha me akuzën për shpifje dhe ofendime.
Kështu ka bërë të ditur, avokati i Haxhiut, Nasuf Hasani.
Kjo padi sipas Hasanit, do të ngrehet ndaj avokatit Berisha, pasi ky i fundit pas lirimit nga arresti, ka deklaruar se arrestimi i tij ka qenë urdhër i ministres Haxhiu.
”Ju njoftoj se jam autorizuar nga Ministrja e Drejtësisë, znj. Albulena Haxhiu që ta përfaqësojë në Gjykatën Themelore të Prishtinës sa i përket paraqitjes së padisë për kompensim dëmi kundër Besnik Berisha, e cila bazë kontesti ka shpifjen dhe fyerjen“, ka shkruar avokati Hasani në Facebook.
Tutje, Hasani ka shkruar se avokati Berisha nëse nesër në konferencën e tij nuk e tërheq deklaratën për Haxhiun, atëherë do të ballafaqohet me betejë ligjore.
”Nga sa u njoftuam përmes mediave, z. Berisha paska thirrur nesër një Konferencë, ku e shfrytëzoj rastin ta ftoj të njëjtin që t’i prezantojë provat që dëshmojnë deklaratën e tij të mbrëmshme se Ministrja Haxhiu e paska urdhëruar Prokurorin Rasim Maloku që ta arrestojë të njëjtin. Në të kundertën, nëse i njëjti nuk e tërheq atë deklaratë nesër dhe nëse nuk kërkon falje, le të përgatitet për betejë ligjore“, ka deklaruar ai./teve1.info./
