Deputetja e Lëvizjes Vetëvendosje, Albulena Haxhiu, mori pjesë në takimin me presidenten e Kosovës, Vjosa Osmani, ku të pranishëm ishin përfaqësuesit e partive politike.
Haxhiu tregoi edhe detajet e takimit ku tha se është përmendur edhe ideja që në të njëjtën datë të zgjedhjeve lokale të mbahen edhe ato të përgjithshmet.
Arsyeja e kësaj, ajo thotë se qëndron pas mos marrëveshjes politike për krijimin e institucioneve. Ndërkohë, deklaroi qëndrimin e VV-së që ka për konstituimin e Kuvendit dhe formimin e Qeverisë.
“Ne paraqitëm qëndrimin tonë si VV. Është me rëndësi që zgjedhjet lokale të mbahen sa më shpejtë, aq më mirë. Nëse zgjedhjet shpallen nesër, është mundësi data 5 tetor, po ashtu 12 tetor apo data 19 tetor. Këto ishin tri datat që u përmendën më së shumti. Në fakt, shumica e përfaqësuesve të partive politike ishin për datën 12 tetor apo 19”, deklaroi ajo para mediave.
“Zgjedhjet është mirë të mbahen sa më herët, për shkak se mund të ketë edhe balotazh. Tashmë, VV-ja ka nisur me shpalljen e kandidaturave, gjegjësisht në komunat ku ne udhëheqim. Kemi bërë të ditur se vazhdojmë me kryetar të njëjtë. KQZ-ja është në përgatitje të disa rregulloreve përkatëse për zgjedhjet lokale, prandaj që të jemi në një linjë. Nuk i kemi ende detajet se me kë do të jemi në koalicion e me kë do të futemi”, deklaroi Haxhiu./teve1.info/
