Presidentja në detyrë, Albulena Haxhiu, ka mbrojtur vendimin për dekretimin e Zejnullah Gashit në postin e Kryeprokurorit të Shtetit, duke i cilësuar si “qesharake” dhe “përpjekje dashakeqe” pretendimet se ai është pjesë e Lëvizjes Vetëvendosje.
E pyetur nga KosovaPress lidhur me dekretimin e Gashit, Haxhiu tha se ai nuk është emëruar pa përvojë, por ka ushtruar më parë detyrën e kryeprokurorit të Prokurorisë Themelore.
“Gashi nuk ka ardhur nga rruga që bëhet kryeprokuror. Ai ka qenë Kryeprokurori i Prokurorisë Themelore, prandaj këto deklarata se është pjesë e Lëvizjes Vetëvendosje janë qesharake. Nuk e di se nga kush kanë ardhur, por janë përpjekje dashakeqe për të dëmtuar një proces që ju të gjithë e keni parë se është mbikëqyrur edhe nga organizatat kredibile të shoqërisë civile, si dhe nga partnerët ndërkombëtarë”, deklaroi Haxhiu.
Ajo theksoi se partnerët ndërkombëtarë e kanë përshëndetur emërimin e Gashit, ndërsa organizatat e shoqërisë civile kanë kërkuar që sa më shpejt të emërohet Kryeprokurori i Shtetit, duke kujtuar se Kosova ka qenë për më shumë se katër vjet me ushtrues detyre në këtë pozitë.
Haxhiu i uroi suksese Gashit në detyrën e re dhe tha se gjatë takimit me të i ka kërkuar që mandatin ta ushtrojë me përgjegjësi të lartë institucionale, integritet profesional dhe moral.
“Është shumë e rëndësishme që mandatin dhe përgjegjësinë e tij ta ushtrojë me përgjegjësinë më të lartë institucionale, me integritet të lartë profesional e moral dhe me përpjekje maksimale për të luftuar krimin e organizuar dhe korrupsionin, në mënyrë që në Republikën e Kosovës të mos ketë zyrtarë të korruptuar që ndihen të paprekshëm”, tha ajo.
Presidentja në detyrë shtoi se prokuroria duhet të jetë e vendosur edhe ndaj çdo përpjekjeje për destabilizimin e vendit, duke përmendur sulmin në Banjskë dhe rastin e Ibër-Lepencit.
“Nuk duhet të ketë përpjekje për të destabilizuar në çfarëdo forme ndonjë pjesë të territorit të Republikës së Kosovës, siç ka ndodhur me sulmin në Banjskë apo në Ibër-Lepenc. Është shumë e rëndësishme që detyrat të kryhen me profesionalizmin më të lartë. Ata që thonë se është në Vetëvendosje, le të vazhdojnë ta bëjnë”, përfundoi Haxhiu.
