Këshilli Prokurorial i Kosovës (KPK), prej kohësh është i kapur nga grupe interesi.
Kështu ka deklaruar nënkryetarja e Kuvendit të Kosovës, Albulena Haxhiu, duke thënë se KPK-ja nuk e ka prioritet përmirësimin e sistemit prokurorial.
Në një postim në Facebook, Haxhiu ka thënë se situata aktuale në KPK është tashmë e dukshme për të gjithë.
“Sot të gjithë po e shohin qartë atë për të cilën kemi paralajmëruar ndër vite. KPK prej kohësh është e kapur nga grupe interesi që nuk e kanë prioritet përmirësimin e sistemit prokurorial, por mbrojtjen e interesave të tyre dhe të individëve jashtë Këshillit”, ka shkruar ajo.
Ajo ka theksuar se reforma në KPK pritet të hyjë në fuqi në janar të vitit 2026, duke e cilësuar këtë si një hap të domosdoshëm për rikthimin e integritetit të institucionit.
“Shumicës së anëtarëve aktualë të KPK-së kjo reformë u ka penguar që nga dita e parë. Ata kanë përdorur çdo mjet të mundshëm për ta bllokuar, por nuk ia dolën dhe nuk do t’ia dalin, sepse drejtësia dhe interesi publik nuk mund të ndalen nga grupe të izoluara interesi”. /teve1.info/
