Në emisionin “Ditari” në Tëvë1, eksperti i çështjeve të energjisë Adhurim Haxhimusa ka folur për projektin e gazit amerikan dhe ndikimet e mundshme të tij në Kosovë.
Sipas Haxhimusës, Kosova rrezikon të përballet me pasoja nëse nuk ka një vizion të qartë afatgjatë për zhvillimin energjetik, duke theksuar rëndësinë e planifikimit për 5, 10 apo 15 vitet e ardhshme.
I pyetur për ndikimin e mundshëm të refuzimit të këtij projekti në marrëdhëniet me Shtetet e Bashkuara të Amerikës, ai ka theksuar se siguria energjetike lidhet drejtpërdrejt me sigurinë kombëtare.
Sipas tij, ndërprerjet afatgjata të energjisë elektrike do të kishin pasoja të mëdha për jetën e përditshme dhe funksionimin e shtetit.
Haxhimusa ka shtuar se, nëse projekti i gazit amerikan konsiderohet si pjesë e sigurisë energjetike, atëherë vendimmarrja duhet të marrë parasysh edhe këtë aspekt.
“Nëse lexojmë midis rreshtave, kryesisht SHBA-të i referohen sigurisë energjetike edhe si një lloj sigurie kombëtare, sepse nëse e marrim një skenar të mungesës së energjisë elektrike për orë, ditë apo javë të tëra, do të kemi paralizim të jetës së përditshme dhe kjo është një çështje shumë e madhe. Prandaj, kur ata i referohen kësaj si siguri energjetike dhe kombëtare, ne e kuptojmë mesazhin që po japin, që ta vendosim këtë aspekt në peshoren e vlerësimit të parametrave të ndryshëm. Ky është një gaz amerikan. Prandaj, si sinjal është shumë i qartë se siguria energjetike është siguri kombëtare”, ka deklaruar ai.
Ai ka theksuar gjithashtu se, në rast refuzimi, institucionet e Kosovës duhet të sqarojnë arsyet dhe të prezantojnë alternativa më të mira ekonomike dhe konkurruese për industrinë dhe shoqërinë.
“Kosova e ka mundësinë dhe, nëse e refuzon, do të ishte shumë me rëndësi që qeveria e Kosovës të sqarojë pse i kanë thënë jo dhe të tregojë çfarë alternative tjetër kanë që sipas tyre është më e mirë ekonomikisht, për industrinë, për shoqërinë dhe që e rrit aftësinë konkurruese të vendit…”, ka përfunduar Haxhimusa./teve1.info./
