Deputeti i Partisë Demokratike të Kosovës Nait Hasani, ka thënë se ka pas kërkesë nga Lëvizja Vetëvendosje për ta votuar kandidaten e tyre për kryeparlamentare, por se e ka refuzuar.
Ai këtë e ka thënë para nisjes së seancës konstitutive të mërkurën që do të jetë tentimi i 26-të.
“Po, kam pasur kërkesë, ju kam treguar. Nuk ka pasur ofertë, por kanë kërkuar mbështetje, por ju kam thanë që nuk ka mundësi”, ka thënë Hasani.
Ai ka thënë se nuk e mbështet një qeveri nga LVV-ja për shkak siç është shprehur, se nuk është treguar korrekte ndaj procesit të Gjykatës Speciale në Hagë ndaj udhëheqësve të Ushtrisë Çlirimtare të Kosovës.
“Atje nuk është Hashimi. Atje është presidenti i vendit dhe ushtria e Kosovës. Ata që e përmbushin kërkesën për mbështetje, e kanë mbështetjen time”, ka thënë ai./teve1.info/
