Deputeti i Partisë Demokratike të Kosovës (PDK), Nait Hasani, ka deklaruar se protesta që do të mbahet nesër në Tiranë, në mbështetje të ish-krerëve të Ushtrisë Çlirimtare të Kosovës që po gjykohen në Hagë, bart një mesazh të fuqishëm kombëtar.
Sipas tij, protesta në Tiranë shpreh solidaritetin e gjithë kombit shqiptar kundër padrejtësive që po u bëhen çlirimtarëve të UÇK-së.
“Protesta e Tiranës ka edhe një mesazh më të fuqishëm sesa ajo e Prishtinës. Ajo tregon se i gjithë kombi shqiptar po bashkohet kundër padrejtësisë ndaj ushtarëve të UÇK-së”, tha Hasani.
Ai konfirmoi se në protestë do të marrin pjesë personalitete të larta, përfshirë ish-presidentin Alfred Moisiu, kryeministrin Edi Rama dhe liderin e BDI-së, Ali Ahmeti.
Hasani shtoi se edhe protestat me motorë që po mbahen në mbështetje të çlirimtarëve “tregojnë fuqinë shpirtërore dhe unitetin e popullit shqiptar për lirinë dhe vlerat e UÇK-së”.
“Protesta e Tiranës ka edhe një mesazh edhe më të fuqishëm, sesa protesta që është mbajtur në Prishtinë. Protesta e Tiranës tregon solidarizimin e gjithë kombit shqiptar për kundër padrejtësisë që po i bëhet ushtarëve të UÇK-së. Në këtë protestë do të marrin pjesë zyrtarë të lartë, si protestave të kaluara. Në protestë nesër do të jetë edhe ish-presidenti Alfred Moisiu, në moshën 95-vjeçare, pra përcjell mesazhin e vetë në atë moshë. Prezentë do të jetë edhe kryeministri Rama, i cili ka ngritur zërin për çlirimtarët në çdo vend të botës, sa herë që i është dhënë mundësia. Aty do të jetë edhe luftëtari Ali Ahmeti, edhe pse ka fushatë atje. Kjo tregon solidaritetin e madh, kundër padrejtësisë dhe mbrojtjen e vlerave të UÇK-së”, deklaroi ai në emisionin “Mesditë” në Tëvë1. /teve1.info/
