Deputeti i Partisë Demokratike të Kosovës (PDK), Nait Hasani, ka akuzuar kryeministrin në detyrë, Albin Kurti se ka refuzuar çdo mundësi për marrëveshje politike me subjektin e tij politik.
Hasani tha se Kurti, PDK-së ia ka mbyllur derën për bashkëpunim, por njëkohësisht është duke i kërkuar vota për të kaluar emrat e propozuar nga Lëvizja Vetëvendosje.
“Ne kemi kërkuar me pasë marrëveshje politike. Ai ka deklaruar se me PDK-në nuk bëj koalicion, ai e ka mbyllë derën. Nuk është punë koalicioni – ofertë, duhet të diskutohen ofertat. ‘Ne jemi për këtë gjendje’, ta bëjmë një zgjidhje. Pajtohesh apo s’pajtohesh është një tjetër çështje pastaj. Por, ai ka thënë se ‘nuk dua me Partinë Demokratike’”, deklaroi ai në emisionin “Mesditë” në Tëvë1.
Sipas tij, Kurti nuk po pranon as të negociojë për një marrëveshje të mundshme me PDK-në, duke e arsyetuar këtë me pretendimin se “PDK-ja nuk është reformuar”.
“Ne kemi kërkuar me pasë marrëveshje politike. Ai ka deklaruar se me PDK-në nuk bëj koalicion, ai e ka mbyllë derën. Nuk është punë koalicioni – ofertë, duhet të diskutohen ofertat. ‘Ne jemi për këtë gjendje’, ta bëjmë një zgjidhje. Pajtohesh apo s’pajtohesh është një tjetër çështje pastaj. Por, ai ka thënë se ‘nuk dua me Partinë Demokratike’. Thotë se ‘PDK-ja nuk është reformuar’. Ai kërkon që partitë tjera t’i reformojë. Nëse ai mendon kështu, është mendimi i tij. Por, partitë kanë reformat e veta brenda”, tha Hasani.
Deputeti i PDK-së theksoi se është e paarsyeshme të kërkohet vota e deputetëve individualë pa një marrëveshje të qartë politike.
“Cila është arsyeja, ta votoj unë personalisht? Ai kërkon prej meje votën, por jo votën e partisë, jo marrëveshjen, jo koalicionin. Ke thënë se me PDK-në ka pikë të kuqe, s’ka marrëveshje. LDK-ja i ka thënë se ne s’bëjmë me juve”, përfundoi Hasani.
Kuvendi i Kosovës po përballet me bllokim institucional dhe pamundësi për të zgjedhur kryetarin e ri të Kuvendit, pas 43 seancave të dështuara./teve1.info/
