Ish-ambasadori i Kosovës në Shqipëri, Nait Hasani, beson që me administratën e Trump do të përshpejtohen procedurat në gjykimin e ish-krerëve të UÇK-së në Hagë.
Por, sipas tij, e rëndësishme është që krerët e shtetit ta kuptojnë që Gjykata Speciale është e padrejtë dhe të kërkojnë nga Trumpi që ky proces të përfundojë.
“Do të përshpejtojnë procedurat, i kanë 4 vjet prapa grilave. Kur i shohim gjitha këto dhe takimet që ka pas presidenti Thaçi me presidentet amerikanë, ata i shohin si favore politike për zgjidhje. Unë besoj që pavarësisht se kush do të jetë si misionar që do të jetë për dialogun, do ta ketë edhe këtë ndikim. Por e para duhet të jetë që Ministria e Jashtme, kryeministri, presidentja ta kuptojnë që kjo gjykatë është e padrejtë. Dhe këta duhet të kërkojnë nga Trump që ky proces të përfundojë, sepse krijimi i Gjykatë Speciale është bërë nën ndikimin e amerikanëve në Kuvendin e Kosovës”, ka thënë Hasani në emisionin “Ditari” në Tëvë1.
Ish-i dërguari i ShBA-së për Ballkanin Perëndimor, Richard Grennell, pas zgjedhjeve në ShBA, kishte thënë se nëse i fitojnë zgjedhjet do të punojnë për lirimin e ish-presidentit Thaçi.
Trump ka fituar garën për president të ShBA-së në zgjedhjet e 5 nëntorit.
