Deputeti i Partisë Demokratike të Kosovës, Nait Hasani, i është drejtuar sot Kuvendit të Kosovës me një fjalim emocional si i mbijetuar i Masakrës në Burgun e Dubravës, duke reaguar ashpër ndaj një ekspozite të organizuar më 24 mars në Prishtinë.
Hasani e cilësoi ekspozitën e realizuar nga Integra dhe Admovere, të drejtuara nga Shkëlzen Gashi dhe Kushtrim Koliqi, si një paraqitje të qëllimshme të narrativave të ish-UDB.
“Sot jam për të thënë në të vërtetë të rëndë ajo që është prezantuar në këtë ekspozitë më 24 mars nuk është vetëm gabim. Është prezantim qëllimshëm i deklarimeve të UDBA-s të asaj kohe. Është fyerje për viktimat, të burgosurit e të mbijetuarit. Është fyerje për të vërtetën për masakrën e Dubravës. Sepse kur në libër e në ekspozitë, të financuar nga institucionet shtetërore dhe paraja publike, për masakrën në burgun e Dubravës thotë se ka pasur kryengritje, janë vrarë 48 ushtarë të armatosur dhe 58 civilë. Ai nuk ka treguar të vërtetën, ai ka prezantuar pas 27 vjete masakrën në Dubravë propagandën e aparatit kriminal serb mbi masakrën e Dubravës”, deklaroi Hasani para deputetëve.
Ai kërkoi që autorët e ekspozitës të mbahen përgjegjës për, siç u shpreh ai, “mashtrimin e institucioneve”, duke i bërë thirrje organeve të drejtësisë të veprojnë në përputhje me ligjin.
Ndërkohë, organizatat Integra dhe Admovere kanë kërkuar falje publike ndaj familjarëve të viktimave civile, duke bërë thirrje për një diskutim të hapur mbi këtë çështje.
Megjithatë, Hasani e cilësoi këtë kërkimfalje si të pamjaftueshme.
“Kjo është e pamjaftueshme, sepse dëmi politik është bërë me prezantimin e versionit të UDB-së. Kjo ekspozitë ka pasoja të rënda për Kosovën dhe kërkimfalja nuk e riparon dëmin e shkaktuar për shtetin dhe për të vërtetën e masakrës së Dubravës,” tha ai.
Në përfundim, Hasani kërkoi edhe hartimin e një ligji të veçantë për “mbrojtjen e vlerave të luftës çlirimtare të Kosovës”.
