Ambasadori i Mbretërisë së Bashkuar në Kosovë, Jonathan Hargreaves ka thënë se në takim me kryetarin e Kuvendit të Kosovës Dimal Basha, ka thënë se janë pajtuar për rëndësinë e konstituimit të plotë të Kuvendit sipas vendimit të Gjykatës Kushtetuese.
Në një postim në Facebook ku ka njoftuar për takimin e zhvilluar të enjten me Bashën, Hargreaves ka thënë se kanë diskutuar edhe për rëndësinë e konsultimeve me komunitetin serb të Kosovës .
“Sot u takova me Kryetarin e ri të Kuvendit, Dimal Basha, për ta uruar për zgjedhjen e tij. Ramë dakord për rëndësinë e konstituimit të plotë të Kuvendit sa më shpejt që të jetë e mundur, duke respektuar çdo vendim të Gjykatës Kushtetuese. Shpresuam që situata të zgjidhet shpejt në mënyrë që Kuvendi dhe një qeveri e re të mund të vazhdojnë me punën thelbësore në të mirë të të gjithë qytetarëve të Kosovës. Diskutuam gjithashtu për rëndësinë e konsultimeve domethënëse me komunitetin serb të Kosovës për të siguruar pjesëmarrjen e tyre të plotë në shoqërinë kosovare, dhe ramë dakord për një vizion të përbashkët për një Kosovë me mundësi për të gjithë”, ka shkruar ai.
