Ish-kreu i Aleancës për Ardhmërinë e Kosovës dhe ish-kryeministri i Kosovës, Ramush Haradinaj, ka deklaruar se çështja e personave të zhdukur gjatë luftës mbetet “plaga më e madhe e shoqërisë sonë”, duke theksuar se zbardhja e fatit të tyre është detyrë kombëtare.
Ai ka theksuar rëndësinë që Serbia të detyrohet t’i hapë arkivat ushtarake dhe të tregojë vendndodhjen e trupave të personave të zhdukur gjatë luftës.
“Varreza masive në fshatin Kalludër të Zubin Potokut kërkon hetim serioz, profesional dhe angazhim të pandalshëm për të detyruar Serbinë që të hapë arkivat ushtarake dhe të tregojë vendndodhjen e trupave”, ka shkruar Haradinaj në Facebook.
Sipas tij, nuk mund të ketë paqe të plotë pa u zbardhur fati i secilit person të zhdukur.
“Në çdo tryezë diskutimi kjo duhet të jetë tema kryesore për t’ia rikujtuar Serbisë krimet e saj, duke kërkuar me vendosmëri drejtësi për viktimat dhe përgjigje për familjet që presin prej vitesh”, ka përfunduar ish kreu i AAK-së.
