Deputeti i Aleancës për Ardhmërinë e Kosovës (AAK), Daut Haradinaj deklaroi se kanë pasur votim të lirë për zgjedhjen e kryeparlamentarit. Pas votimit të Dimal Bashës për kryetar të Kuvendit, Haradinaj tha se sfidë e radhës do të jetë votimi i nënkryetarëve.
Deputeti i AAK-së, Daut Haradinaj tha se LVV e ka pasur seriozisht kandidimin e Bashës për kryeparlamentar.
“Ne kemi pasur një votim të lirë si grup parlamentar. Unë personalisht ia kam dhënë votën edhe mendoj që u pa që e kanë seriozisht. Edhe i pyeta, a e keni seriozisht që ky është kandidati më i preferuar i LVV-së, thanë po. Edhe kështu vepruam, votuam për edhe i uroj suksese”, tha ai.
Pas votimit për kryeparlamentar, Haradinaj tha se sfidë e radhës do të jetë zgjedhja e nënkryetarëve.
“Tash ky është realiteti i Kosovës edhe deri në pafundësi nuk mund ta lëmë kështu. Më mirë mendoj që ky moment le të jetë hapi i parë por ta shohim se si do të jeta sfida e radhës për nënkryetarë. Edhe aty e shoh një problem që nuk do të kalon shumë lehtë edhe sidomos kur dihet që nënkryetarët do të votohen ndaras. Një herë do të jenë nënkryetarët e partive parlamentare shqiptare dhe pastaj do të jetë nënkryetari i komunitetit serb, në të cilën nuk e di si do të jetë situata rreth numrit të votave”, u shpreh Haradinaj.
Pyetje një milionëshe e konsideroi Haradinaj atë se me “Dimal Bashën nuk është bllokuar komplet Kuvendi.
“Pyetje një milionëshe, nuk e di, duhet me i pyet ata që e nominuan. Unë edhe ashtu prej presionit publik nga do që kemi shkuar, mos e bllokoni. Ne i kemi dhënë një shans edhe duhet me ju dhënë mundësi që ai të dëshmojë tash”, shtoi ai.
