Kryetari i Aleancës për Ardhmërinë e Kosovës, Ramush Haradinaj, të martën ka vizituar Drenasin dhe Skenderajn, në mbështetje të kandidatëve për kryetar nga këto komuna.
Haradinaj ka thënë se kandidati i AAK-së për Drenasin dëshmon frymë, vullnet e përkushtim për ta çuar përpara vizionin “Dritë për Drenasin”.
“Në Drenas, kandidati ynë për kryetar, Beqir Kiqina, me ekipin e tij, dëshmon frymë, vullnet e përkushtim për ta çuar përpara vizionin “Dritë për Drenasin”. Përkrahja e bizneseve të vogla e të mesme, zgjidhja e problemit të ujit të pijshëm e kanalizimit dhe zhvillimi i qëndrueshëm ekonomik janë shtylla të forta të programit tonë. Me Beqirin janë bashkuar shumë të rinj e të reja që besojnë në energjinë dhe vizionin e Aleancës për një Drenas më të zhvilluar.”, shkroi Haradinaj për kandidatin e Drenasit nga AAK-ja.
Ndërsa, për kandidatin e Skenderajt, Feriz Shala, theksoi se interesi i qytetarit vihet mbi gjithçka.
“Në Skenderaj, lista jonë udhëhiqet nga Feriz Shala, profesionist dhe aktivist i hershëm i Aleancës, të cilit i janë bashkuar personalitete të përkushtuar për të sjellë një qasje ndryshe në Asamble, ku interesi qytetar vihet mbi gjithçka. “Dritë për Komunat” nuk është vetëm slogan, por vizion për ta shtrirë qeverisjen shembullore në secilën komunë.”, theksoi Haradinaj në postimin e tij në Facebook.
