Ish-kryetari i Aleancës, Ramush Haradinaj, ka përgëzuar Shqipërinë për përmbylljen e tre kapitujve të rinj në kuadër të negociatave për anëtarësim në Bashkimin Evropian, duke e cilësuar këtë si një dëshmi se integrimi evropian është i arritshëm përmes vizionit dhe angazhimit institucional.
Përmes një reagimi publik, Haradinaj tha se çdo sukses i Shqipërisë është lajm i mirë për të gjithë shqiptarët, duke vlerësuar se avancimi në procesin integrues përbën një hap të rëndësishëm për vendin fqinj.
Ai theksoi se ky zhvillim duhet të shërbejë edhe si reflektim për Kosovën, duke shtuar se, ndërsa vendet e rajonit po ecin përpara në rrugën drejt integrimit evropian, Kosova po mbetet prapa.
Sipas Haradinajt, ngecja e Kosovës është pasojë e, siç u shpreh ai, “një mendësie qeverisëse destruktive” dhe e izolimit në raport me partnerët ndërkombëtarë.
Në fund të reagimit, Haradinaj uroi Shqipërinë për këtë arritje dhe shprehu dëshirën që edhe Kosova ta rikthejë perspektivën për integrim euroatlantik, në mënyrë që të mos mbetet prapa vendeve të tjera të rajonit.
