Kryetari i AAk-së, Ramush Haradinaj, ka thënë se Qeveria Kurti qytetarët po i mashtron sa i përket situatës ekonomike në raport me buxhetin e shtetit, si dhe për fushën e punësimit.
Haradinaj ka thënë se janë të rralla rastet kur në kohë krize ekonomike, sociale e shëndetësore, shtetit t’i teprojnë para ose edhe mos i mbledh as të hyrat e parapara për buxhetin e vet.
Sipas ish-kryeministrit, qeveria ka paraparë që për vitin 2022 t’i shpenzojë rreth 3 miliardë e 158 milionë euro, por i ka shpenzuar vetëm 2 miliardë e 625 milionë. Për këtë Haradinaj thotë që qeverisë i kanë tepruar hiç më pas se 533 milionë e 852 mijë euro.
“Me buxhetin e vitit 2022, për investime kapitale ishin paraparë 698 milionë euro e janë realizuar 422 milionë. Dmth 280 milionë më pak. Për dy vjet kësaj qeverie i kanë mbetur të pashfrytëzuara 478 milionë, vetëm nga investimet kapitale. Kjo dmth se është investuar më pak, është punuar më pak, është fituar më pak. Gjithçka më pak, vetëm se qytetari është varfëruar më shumë”, ka shkruar Haradinaj në një postim në Facebook.
Ai tutje ka shtuar se “për të qenë tablloja edhe më e zezë, prej këtyre 422 milionëve të investimeve kapitale, rreth 24 milionë janë pagesa ndëshkimore pa kurrfarë përfitimi, 88 milionë avanse për punë që as që kanë filluar, 16 milionë për mirëmbajtje, 17 për ndërtesa administrative e kështu me radhë… Dmth rreth gjysma e kësaj shume (diku rreth 210 milionë) të investimeve kapitale, janë sikur të mos kishin ndodhur fare sepse s’kanë patur asnjë efekt në zhvillimin ekonomik”.
I pari i AAK-së thotë që propagandë të tmerrshme ka pasur edhe në fushën e punësimit. /teve1.info/
w
