Aleanca për Ardhmërinë e Kosovës, ka bërë të ditur se ka filluar përgatitjet për zgjedhjet lokale që do të mbahet në fund të këtij viti.
Këtë e ka bërë të ditur kryetari i AAK-së, Ramush Haradinaj i cili ka njoftuar se kanë mbajtur mbledhjen e kryesisë.
Ai ka thënë se në këtë mbledhje kanë analizuar zgjedhjet e 9 shkurtit të cilat tha se janë motivuese për të forcuar lidhjen me qytetarët.
“Në takim me Kryesinë e Aleancës, analizuam rrugëtimin tonë në zgjedhjet e 9 shkurtit. Këto zgjedhje, na motivojnë edhe më shumë për të forcuar lidhjen me qytetarët dhe për të avancuar vizionin tonë për Kosovën. Me vendosmëri të plotë, nisëm përgatitjet për zgjedhjet lokale që na presin. Aleanca do të mobilizohet në çdo komunë, me programe dhe kandidatët më të mirë që do t’i shërbejnë qytetarëve”, ka shkruar Haradinaj në Facebook.
AAK e cila ishte pjesë e koalicionit për “Kosovën Fituese” në zgjedhjet parlamentare të 9 shkurtit ka marrë 7.45% të votave.
