Kryetari i Aleancës për Ardhmërinë e Kosovës (AAK), Ramush Haradinaj, reagoi pas vizitës së kryeministrit Albin Kurti në Maqedoni të Veriut, përkatësisht rreth rrugës Prizren – Tetovë.
Haradinaj duke iu drejtuar shqiptarëve në Maqedoni të Veriut, tha se Kurti dëshiron t’i mashtrojë pasi ka bllokuar të gjitha projektet në Kosovë.
“Të dashur bashkombas shqiptarë në Maqedoni të Veriut, mos i besoni mashtruesit Albin Kurti. Në Kosovë i ka bllokuar të gjitha rrugët e projektet, përfshirë edhe rrugën e Plavës. Pasi nuk mund t’i gënjej më kosovarët, paska ardhur t’ju mashtrojë ju, për rrugën Tetovë – Prizren”, ka shkruar ai në Facebook.
Sipas kreut të AAK-së, Kurti kishte tentuar njëjtë të mashtronte edhe në Shqipëri “por nuk i besuan dhe e përzunë”.
“Edhe në Shqipëri tentoi njëjtë, por nuk i besuan dhe e përzunë. As ju mos bini pre e mashtrimeve të tij”, përfundoi Haradinaj.
