Kryetari i AAK-së, Ramush Haradinaj i ka cilësuar thikë pas shpine veprimet e Qeverisë Kurti, ku e ka përmendur Ligjin për Pagën minimale, përjashtimin e Kosovës nga “Defender 23” e tërheqjen e policëve nga veriu, raporton teve1.info
Përmes një statusi në Facebook, Haradinaj ka thënë se situata e së enjtes në Kuvendin e Kosovës është alarm se situata mund të përshkallëzohet edhe jashtë Kuvendit.
“Ngjarjet e djeshme në Kuvendin e Kosovës dhe dhuna e shpërfaqur aty, janë alarm se situata mund të përshkallëzohet, jo vetëm në Kuvendin e Kosovës por edhe jashtë tij.
Kosova nuk mund të qëndrojë e qetë, në kohën kur Qeveria e vendit, na e ngulë thikë pas shpine aty ku na dhemb më së shumti, në lidhjen më të shenjtë të Kosovës, me NATO-n, Amerikën dhe me kategoritë e lirisë.
Do të jemi të pakompromis dhe më të vendosur se kurrë në mbrojtje të interesave të shtetit e të qytetarit, aspiratës sonë për anëtarësim në NATO, në ruajtjen e miqësisë me aleatët tanë, Amerikën dhe BE e në mbrojtje të vlerave të lirisë sonë”, ka shkruar ndër të tjera Haradinaj.
Ai ka thënë se thikë pas shpine është edhe koordinimi i fshehtë i Albin Kurtit me armiqtë e Kosovës për të përmbysur luftëtarët e lirisë.
“Zbardhja e koordinimit të fshehtë të përfaqësuesve të Albin Kurtit me armiqtë e shtetit të Kosovës, për të përmbysur kategorinë më të shenjtë – luftëtarët e lirisë, është thikë pas shpine.
Thikë pas shpine është edhe prishja e marrëdhënieve me aleatët e Kosovës, BE dhe SHBA, që rezultoi me përjashtimin e Kosovës nga “Defender 23”, duke e komplikuar tej mase aspiratën e Kosovës për anëtarësim në strukturat euro-atlantike.
Tërheqja e tij nga veriu, me një vonesë të pashpjegueshme dhe vetëm pasi që Kosova është futur nën sanksione të BE-së dhe të SHBA-së, duke i shkaktuar kështu një dëm të pariparueshëm vendit, nuk mund të konsiderohet ndryshe përveç si një politikë antishtetërore e antikombëtare”, ka shkruar Haradinaj.