Haradinaj tha se këtij sektori i ka munguar dora e shtetit.
“Bujqësia është sektor me rëndësi thelbësore për vendin. Ky sektor edhe në kushte normale ekonomike operon me vështirësi, e duke pasur parasysh se koha për të cilën po flasim është situatë pandemike, atëherë mungesa e dorës së shtetit ka qenë e tmerrshme”, ka shkruar ai në një postim në Facebook.
Po ashtu, Haradinaj tha se Qeveria Kurti i ka prerë në besë fermerët.
“Qeveria Kurti ka prerë në besë fermerët, të cilët në vend të rritjes së subvencioneve sipas premtimeve, në vitin e kaluar ata u përballën me papërgjegjësinë totale të qeveritarëve. Planifikimi për vitin 2022, si duket ka nisur në kohë, por krahasimet statistikore me vitin paraprak janë qesharake”, tha ai.
Ndërkaq, i pari i AAK-së thotë se Qeveria duhet të ndërmerr veprime të shpejta e njëri prej tyre edhe kompensim të dëmeve që iu shkaktuan sektorit të bujqësisë gjatë vitit 2021.
“Në kohën kur shumë shtete po e ndërprejnë eksportin e produkteve agroushqimore, duke përfshirë edhe grurin, subvencionimi i fermerëve është një domosdoshmëri, ashtu siç janë edhe masat e tjera të nevojshme për përkrahjen e këtij sektori. Në vend të fjalëve të zbrazëta në konferenca shtypi, Qeveria duhet të ndërmerr veprime të shpejta e vendime të përgjegjshme, një prej tyre edhe kompensimi i dëmeve që i shkaktuan sektorit të bujqësisë gjatë vitit 2021, për shkak të mosveprimit me kohë të tyre”, ka përfunduar Haradinaj. /teve1.info/
