Kryetari i Aleancës për Ardhmërinë e Kosovës, Ramush Haradinaj, ka deklaruar se Qeveria Kurti me qasjen vet-izoluese e ka përjashtuar Kosovën nga harta e investimeve.
Haradinaj, ka thënë se vet-izolimi i Kosovës po sjellë jo vetëm dëme politike por edhe dëme të mëdha ekonomike.
“Kjo po reflektohet qartë në largimin masiv të fuqisë punëtore dhe mungesën e vendeve të reja të punës për shkak të mungesës së investimeve”, ka shkruar ai në Facebook.
Sipas Haradinaj, këtë shqetësim të tij se shumë investitorë po i drejtohen shtetit të rajonit, e ka theksuar edhe i dërguari special i Gjermanisë për Ballkanin Perëndimor, Manuel Sarrazin, në Forumin e Dytë Ekonomik Gjermano-Kosovar, të organizuar nga Oda Ekonomike Gjermano-Kosovare .
Më tej, ai ka shtuar se Kosovës i duhet ndryshim urgjent për ta kthyer vendin në rrugën e zhvillimit, pasi siç ka thënë ai ’ Kosova ka potencial në inovacion dhe zhvillim, por për të përfituar nga ky potencial, duhet një mentalitet i ri qeverisës’.
“Gjermania ka qenë dhe mbetet një shtyllë e fortë në krijimin dhe ndërtimin e shtetit të Kosovës, si dhe një ndër partnerët tanë kryesorë. Për fat të keq, me qasjen vet-izoluese të Qeverisë së Kosovës, vendi ynë është përjashtuar nga harta e investimeve të jashtme. Këtë e theksoi edhe i dërguari special i Gjermanisë për Ballkanin Perëndimor, z. Manuel Sarrazin, në Forumin e Dytë Ekonomik Gjermano-Kosovar, të organizuar nga Oda Ekonomike Gjermano-Kosovare, ku konfirmoi shqetësimin tonë se shumë investitorë po i drejtohen shteteve të tjera të rajonit. Vet-izolimi i Kosovës po na sjell jo vetëm dëme politike, por edhe dëme të mëdha ekonomike. Kjo po reflektohet qartë në largimin masiv të fuqisë punëtore dhe mungesën e vendeve të reja të punës për shkak të mungesës së investimeve. Kosovës i duhet ndryshim urgjent, për ta kthyer vendin në rrugën e zhvillimit. Ne kemi potencial në inovacion dhe zhvillim, por për të përfituar nga ky potencial, na duhet një mentalitet i ri qeverisës”, ka shkruar Haradinaj./teve1.info/
