Kryetari i Aleancës për Ardhmërinë e Kosovës ka publikuar vizionin e tij për anëtarësimin direkt të Kosovës në NATO.
Ai ka përmendur tri aspekte të planit të ri për anëtarësim duke përfshirë atë politik, ushtarak dhe ekonomik.
Në aspektin politik ka theksuar se duhet Forcim i marrëdhënieve me institucionet euroatlantike; Përmbushja e obligimeve në dialog; Konsolidimi i demokracisë në Kosovë; Përmirësimi i marrëdhënieve me fqinjtë.
Në aspektin ushtarak i ka përmendur ngritjen e kapaciteteve luftarake të Ushtrisë së Kosovës; Zhvillimi i industrisë mbrojtëse vendore; Prodhimi i municioneve, predhave dhe pajisjeve të tjera ushtarake;Përmirësimi i infrastrukturës ushtarake dhe mbrojtëse civile; Rritja e kontributit të Kosovës në angazhimet e NATO-s.
“Plani dhjetëvjeçar i dakorduar me Amerikën dhe NATO-n është themeli për veprimin e ardhshëm – anëtarësimin e drejtpërdrejtë. Partneriteti për Paqe tashmë është realizuar përmes këtij plani”, ka shkruar Haradinaj.
Ai ka thënë se anëtarësimi në NATO është përgjigje për zhvillimin e përgjithshëm të vendit, duke përfshirë qëndrimin e popullatës, përmirësimin e arsimit dhe shëndetësisë, si dhe sigurimin e pagave të dinjitetshme.
