Kryetari i AAK-së, Ramush Haradinaj, ka deklaruar se forcimi i administratës shtetërore do të jetë një nga prioritetet kryesore të Programit të Aleancës. Këto komente ai i bëri gjatë një takimi me Sindikatën e Pavarur të Administratës së Kosovës dhe kryetarin e saj, Ali Gashi.
Haradinaj theksoi se një shtet i funksionuar nuk mund të ndërtohet pa një shërbim civil të motivuar dhe të trajtuar me dinjitet.
“Pa një administratë të fortë nuk ka as shtet të fortë. Aktualisht shumë punëtorë të administratës nuk kanë motivim, sepse nuk paguhen si duhet dhe nuk respektohen sa meritojnë.”
Ai njoftoi se, sipas planit të AAK-së, me ardhjen në qeveri shërbimi civil do të ketë pagën më të lartë në rajon, si dhe mbrojtje të plotë juridike si shërbyes të shtetit.
Haradinaj shtoi se ky zotim është pjesë thelbësore e vizionit të Aleancës për ndërtimin e një shteti funksional dhe efikas, ku dinjiteti i nëpunësit publik është në qendër të reformave.
Lideri i AAK-së theksoi se përmirësimi i kushteve të administratës është i domosdoshëm për të garantuar stabilitet dhe progres në sektorët e tjerë të shtetit.
