Kryetari i Aleancës për Ardhmërinë e Kosovës, Ramush Haradinaj, ka pritur sot në takim ambasadorin e Gjermanisë në Kosovë, Jörn Rohde. Takimi u fokusua në zhvillimet aktuale politike në vend, me theks të veçantë situatën e krijuar pas zgjedhjeve parlamentare.
Përmes një njoftimi publik, Haradinaj ka bërë të ditur se në këtë takim ka rikonfirmuar përkushtimin e tij dhe të partisë për të ndihmuar në gjetjen e një zgjidhjeje për tejkalimin e bllokadës disa mujore, me synimin për konstituimin e Kuvendit dhe formimin e institucioneve të reja.
“Sot pata kënaqësinë të mirëpres në zyrat e Aleancës ambasadorin gjerman në Kosovë, z. Jörn Rohde. Gjatë takimit diskutuam për zhvillimet aktuale në vend. Rikonfirmova përkushtimin tim dhe të Aleancës për të ndihmuar në gjetjen e një zgjidhjeje për tejkalimin e bllokadës”, ka shkruar Haradinaj në rrjetet sociale.
Ai ka shprehur mirënjohje për angazhimin e ambasadorit Rohde dhe për përkrahjen e vazhdueshme të Gjermanisë në rrugën euroatlantike të Kosovës.
