Kryetari i Aleancës për Ardhmërinë e Kosovës, Ramush Haradinaj, ka thënëse largimi i anëtarëve të Listes Serbe në veri të vendit, është në kundërshtim me normat demokratike dhe në dëm të vetë serbëve.
Sipas tij, ata duhet të jenë pjesë e proceseve që rrisin mirëqenien, sigurinë dhe përparimin e tyre.
“Thirrjet e Listës Serbe që serbët e Kosovës ta bojkotojnë regjistrimin e popullsisë si dhe tërheqja e anëtarëve serbë nga komisionet komunale zgjedhore në veri, janë në kundërshtim me normat demokratike dhe në dëm edhe të vetë qytetarëve serbë. Ata duhet të jenë pjesë e proceseve që rrisin mirëqenien, sigurinë dhe përparimin e tyre”, ka thënë Haradinaj.
Derisa shtoi se këto procese nuk duhet të lidhen me agjendat politike të Beogradit.
“Këto procese nuk duhet të lidhen me agjendat politike të Beogradit. Regjistrimi i popullsisë është interes i të gjithë qytetarëve, përfshirë edhe qytetarët serbë dhe në asnjë rrethanë nuk mund të ndikohet nga agjendat politike. Politika e Beogradit, duhet të heqë dorë njëherë e përgjithmonë nga instrumentalizimi i serbëve të Kosovës për agjenda politike”, tha tutje Haradinaj.
