Kreu i Aleancës për Ardhmërinë e Kosovës, Ramush Haradinaj ka përkujtuar sot Betejen e Llapushnikut në 25 vjetorin e saj. Haradinaj ka thënë se beteja e Llapushnikut ishte ndër betejat më të lavdishme të luftës çlirimtare, shkruan teve1.info
Përmes një postimi në Facebook, deklaroi se trimat e Ushtrisë Çlirimtare të Kosovës i ndalën armikut një prej arterieve kryesore të furnizimit dhe logjistikës, duke shënuar një kthesë me rëndësi në zhvillimin e luftës frontale.
“25 vjet më parë, në Llapushnik po zhvillohej një betejë e cila i dha kahje të re luftës sonë për liri. Beteja e Llapushnikut, ishte ndër betejat më të lavdishme të luftës sonë çlirimtare. Trimat e Ushtrisë Çlirimtare të Kosovës i ndalën armikut një prej arterieve kryesore të furnizimit dhe logjistikës, duke shënuar një kthesë me rëndësi në zhvillimin e luftës frontale”, ka shkruar ai.
“Me përulje e respekt kujtojmë e nderojmë, 47 dëshmorë dhe 54 martirë që ranë në altarin e lirisë së Kosovës, lavdia e të cilëve do të mbijetojë me shekuj”, shtoi ai.
