Ish- kreu i Aleancës, Ramush Haradinaj, ka përkujtuar rreshterin e Policisë së Kosovës, Afrim Bunjaku, në trevjetorin e rënies së tij në Banjskë.
Përmes një postimi në Facebook, Haradinaj ka nderuar Bunjakun, i cili u vra më 24 shtator 2023 gjatë përballjes me grupin e armatosur në veri të Kosovës.
“Sot u bënë tre vjet prej se listës së dëshmorëve të Kosovës iu shtua edhe emri i rreshterit Afrim Bunjaku. Në këtë përvjetor të tretë, kujtojmë me nderim të lartë njeriun që ra në krye të detyrës, duke mbrojtur Kosovën e lirë dhe të pavarur nga agresioni dhe grupet kriminale serbe”, ka shkruar Haradinaj.
Ai ka ngritur edhe çështjen e përgjegjësisë për sulmin në Banjskë, duke e ndërlidhur këtë me trajtimin e përgjegjësisë për krimet e luftës në Kosovë.
“Është një ironi e dhimbshme e historisë kur agresorët që na sulmojnë tash e sa dekada mbeten të lirë e Kosova ende përjeton sulme prej tyre, ndërsa çlirimtarët tanë, ata që e mbrojtën këtë tokë në ditët më të vështira sot gjykohen padrejtësisht në Hagë”, ka deklaruar ai.
Haradinaj ka thënë se historia e Kosovës nuk duhet të rishkruhet dhe ka përmendur vuajtjet e viktimave të luftës dhe familjeve të tyre.
“Kushdo që po tenton ta rishkruajë historinë e Kosovës dhe ta barazojë viktimën me agresorin, le ta dijë se plagët tona janë ende krejtësisht të freskëta”, ka shkruar Haradinaj.
Në mesazhin e tij, Haradinaj ka përmendur edhe familjet e personave të zhdukur, viktimat e dhunës seksuale gjatë luftës dhe dëshmorët e Kosovës.
Në fund, ai ka shprehur nderimin për Afrim Bunjakun dhe të gjithë dëshmorët e Kosovës.
“Lavdi e përjetshme Heroit të Kosovës, Afrim Bunjaku! Lavdi të gjithë dëshmorëve të Kombit”, ka shkruar Haradinaj.
