Kryetari i AAK-së, Ramush Haradinaj, ka reaguar pas deklaratave të kryeministrit në detyrë, Albin Kurti, ndaj Gjykatës Kushtetuese.
Ai e ka cilësuar të dhimbshme faktin që, siç tha, një kryeministër që ka qenë dhe që synon të rikthehet në këtë post, “nuk e njeh institucionin më të lartë të drejtësisë dhe e sulmon aq egër e ulët”.
“E dhimbshme kur kryeministri i deritashëm dhe ai që pretendon të jetë prapë kryeministër, nuk e njeh institucionin më të lartë të drejtësisë në vendin e vet dhe e sulmon aq egër e aq ulët. Ai nuk flet për shkeljet e njëpasnjëshme të Kushtetutës që i ka bërë ai e partia e tij, por zgjedh të mashtrojë sikur fajin e paskan gjyqtarët e Kushtetueses. Kjo ma kujton atë shprehjen popullore kur ‘hajni bërtet kapeni hajnin’”, ka shkruar Haradinaj në facebook.
Ai tha se gjyqtarët e Kushtetueses janë zgjedhur nga Kuvendi legjitim i Kosovës, jo nga “formacionet imagjinare” të Kurtit.
“E vërteta për bllokimin, jo vetëm të Parlamentit por edhe të Shtetit, e ka vetëm një emër e ky është Albin Kurti dhe kjo sot është e qartë për secilin, veç në mendjen e Albin Kurtit është e mjegullt”, shtoi Haradinaj.
Kreu i AAK-së kërkoi nga Gjykata Kushtetuese që në interpretimet për shkelje të Kushtetutës të përcaktojë edhe pasojat juridike për individët apo grupet që i shkaktojnë ato.
“Vetëm drejtësia e plotë është drejtësi!”, ka përfunduar ai.
