Kryetari i Aleancës për Ardhmërinë (AAK), Ramush Haradinaj, ka kërkuar nga presidentja Vjosa Osmani të distancohet nga Qeveria Kurti, teksa u shpreh skeptik për mundësitë e mbajtjes së zgjedhjeve të parakohshme.
Sipas tij, ekzekutivi ka një mori dështimesh si në ekonomi, politikë të jashtme por edhe dëmtim të raporteve me aleatët.
Ai në një konferencë për media sot tha se data më e favorshme për mbajtjen e zgjedhjeve është 26 janari 2025, derisa u shpreh skeptik për mundësitë e mbajtjes së zgjedhjeve të parakohshme.
“Së pari, dështimet në marrëdhëniet e jashtme, me aleatët më të rëndësishëm të Kosovës, BE dhe SHBA. Grupimi i dytë i dështimeve janë në kapjen e institucioneve të pavarura. Nuk ka mbetur asnjë institucion që nuk i është armiqësuar kjo qeveri. Grupimi i tretë ka të bëjë me dështimet ekonomike, mos-investimi dhe mos-rritja e pagave e deri te paaftësia për të ndaluar rritjen enorme të çmimeve”, tha ai.
