Në një bisedë telefonike për Tëvë 1, Haradinaj theksoi se protesta e veteranëve është e drejtë, pasi të njëjtit po insistojnë për të drejtat e tyre.
“Ne e kemi pas një qëndrim publik edhe dje edhe gjatë ditëve, që është një padrejtësi që po bëhet. Ne kemi propozuar edhe do të insistojmë që përmes deputetëve të Kuvendit të bëhet amandetimi i këtij projektligji dhe t’u jepet imuniteti në bazë të ligjit të kaluar, që parashihet që pensioni i veteranëve të jetë në mesatare me pagën minimale, që i bjen të jetë 250 euro ose 270 euro. Pra është një protestim i drejtë, kushtetues, por në këtë rast edhe protestim i moralshëm, përshkak se ata po insistojnë në të drejtat e tyre, por megjithatë duhet të reflektojë mazhoranca dhe t’i ftoj, t’i takoj dhe ta gjejnë një zgjidhje sa më shpejtë“, tha Haradinaj.
Ai shtoi se kryeministri i vendit Albin Kurti duhet ta ofrojë një zgjidhje urgjentisht.
“Nuk duhet t’i hudhet benzinë zjarrit. Edhe Kurti edhe deputetët e Kosovës duhet ta ofrojnë një zgjidhje urgjente. Nuk është arsyetim se nuk ka buxhet, nuk ka arsyetim se është numër i madh apo i zgjeruar“, potencoi Haradinaj.
Protesta e veteranëve po organizohet në shenjë kundërshtimi ndaj vendimit të Qeverisë së Kosovës e cila në Projektligjin për pagën minimale nuk ka përfshirë edhe ata. /Teve1.info/
