Kryetari i AAK-së, Ramush Haradinaj ka përkujtuar Ditën e Çlirimit në Kompleksen Memorial të Shqiponjës, ku janë nderuar të rënët e Ushtrisë Çlirimtare të Kosovës.
Haradinaj tha se beteja dhe fitorja e UÇK-së më 17 maj 1999 në Shqiponjë përfaqëson një moment të rëndësishëm historik për vendin dhe sakrificën për liri.
Ai theksoi se kjo fitore u bë simbol i mbrojtjes së atdheut dhe ndikoi në rrugën drejt çlirimit të Kosovës vetëm pak javë më vonë. Ai shtoi se gjatë shënimit të Ditës së Çlirimit u përkujtua edhe Epopeja e Shqiponjës, ndërsa u bënë homazhe për burrat dhe gratë që prehen në kompleksin memorial.
Haradinaj thotë se të rënët për liri mbeten frymëzim dhe udhërrëfyes për angazhimet e sotme për Kosovën.
“Fitorja e madhe e Ushtrisë Çlirimtare të Kosovës, më 17 maj 1999 në Shqiponjë, u shndërrua në testament kombëtar të mbrojtjes së nderit të Atdheut. Kjo fitore u reflektua në mbarë vendin dhe brenda disa javëve Kosova u bë e lirë. Ndërkohë që sot shënuam Ditën e Çlirimit, kujtuam Epopenë e saj dhe nderuam më meritorët, burrat dhe gratë që pushojnë në Kompleksin Memorial të Shqiponjës, të cilët mbesin udhërrëfyesi ynë në çdo angazhim tonin për Kosovën që e ëndërruan të rënët ndër breza”, ka shkruar ai në Facebook.
