Kryetari i Aleancës për Ardhmërinë e Kosovës, Ramush Haradinaj të hënën ka marrë pjesë në ceremoninë përkujtimore të mbajtur në Gllogjan, me rastin e 26-vjetorit të rënies së Arben dhe Luan Qerimajt.
Haradinaj ka bërë të ditur se në këtë ceremoni po ashtu janë kujtuar edhe bashkëluftëtarët e tyre të rënë po në këtë ditë, Rexhep Tafaj, Ekrem Berisha, Fetah Selca, Beslim Alijaj dhe Haki Krasniqi.
“Të gjithë këta trima që i kujtuam sot ishin të veçantë, secili në mënyrën e vet. Në përvjetorin e rënies së tyre, ne nderojmë shpirtin e tyre luftarak, besnikërinë ndaj shokëve dhe vendosmërinë për të mos u dorëzuar kurrë përballë armikut”, ka shkruar ai në Facebook.
Më tej, ai ka shtuar se në ditë si kjo, kujtohet se sa e gjatë, e vështirë dhe e shtrenjtë ishte rruga deri te liria e arritur.
Haradinaj ka theksuar se lufta e UÇK-së hapi rrugën për për ndërtimin e shtetit të Kosovës, krijoi aleancën me NATO-n, si dhe aleancën me Shtetet e Bashkuara të Amerikës.
“Në ditë si kjo, kujtojmë se sa e gjatë, e vështirë dhe e shtrenjtë ishte rruga deri te liria që gëzojmë sot. Ishte lufta heroike e Ushtrisë Çlirimtare të Kosovës ajo që solli lirinë dhe e hapi rrugën për ndërtimin e shtetit tonë. Ishte kjo luftë që krijoi aleancën tonë me NATO-n dhe Shtetet e Bashkuara të Amerikës, një aleancë që duhet ta ruajmë e ta forcojmë me krenari. Misionin tonë për sigurimin e lirisë sonë nuk duhet ta ndalim derisa të bëhemi ofrues të sigurisë, si pjesë e NATO-s, të rreshtuar pranë botës demokratike, udhëhequr nga Amerika. I përjetshëm qoftë kujtimi për Luan e Arben Qerimaj, Rexhep Tafaj, Ekrem Berisha, Fetah Selca, Beslim Alijaj dhe Haki Krasniqi”, ka shtuar Haradinaj.
