Në Kuvendin e 10-të Zgjedhor të Aleancës për Ardhmërinë e Kosovës, ku pritet të zyrtarizohet zgjedhja e Ardian Gjini në krye të partisë, kryetari aktual Ramush Haradinaj mbajti një fjalim para delegatëve, duke folur për rrugëtimin e tij politik dhe për vazhdimin e angazhimit në shërbim të Kosovës dhe Aleancës.
Haradinaj konfirmoi se po ia dorëzon drejtimin e partisë Gjinit, për të cilin tha se gëzon besimin e plotë të strukturave të AAK-së.
“Sot, kryetar Ardian, unë dhe Aleanca besojmë tek ti. Besojmë që të jesh prijësi ynë, prijësi i Kosovës”, deklaroi ai para të pranishmëve.
Në fjalën e tij, Haradinaj rikujtoi angazhimin e tij nga lufta çlirimtare deri në jetën politike, duke theksuar se kontributi për vendin nuk ndalet me largimin nga posti drejtues.
“Shërbimi për Kosovën nuk përfundon kurrë”, u shpreh ai.
Ndërkohë, Gjini falënderoi Haradinajn për besimin dhe e cilësoi atë si një nga figurat më të rëndësishme politike në vend.
“Ramush Haradinaj është simbol i Kosovës, simbol i lirisë dhe i një politike të mençur që ka shënuar Kosovën për më shumë se 30 vjet”, tha Gjini.
Ai u shpreh i nderuar për përgjegjësinë e re në krye të AAK-së dhe falënderoi delegatët dhe anëtarësinë për mbështetjen, duke shtuar se historia politike e Haradinajt do të mbetet pjesë e rëndësishme e historisë së Kosovës.
Kuvendi zgjedhor i AAK-së pritet të formalizojë zgjedhjen e Gjinit si kryetar i ri i partisë, si dhe kandidaturën e tij për të udhëhequr listën në zgjedhjet e ardhshme.
