Kryetari i AAK-së, Ramush Haradinaj, thotë që jemi krenarë se kemi Kushtetutë moderne e të avancuar.
Haradinaj thotë që Kushtetuta deri tash ka respektuar me dinjitet vendimet e Gjykatës Kushtetuese, edhe atëherë kur sipas tij, nuk ju kanë konvenuar grupacioneve politike.
Ish-kryeministri ka ftuar Qeverinë e Kosovës që të tërhiqet nga sjelljet kundërshtuese dhe ta ruajë sigurinë juridike.
“Ftoj edhe këtë qeveri që të tërhiqet nga sjelljet kundërkushtetuese dhe ta ruajnë sigurinë juridike të cilën e ndërtuam me vite. Siç thuhet edhe në Kushtetutë, pushteti i Qeverisë buron nga Kushtetuta, andaj edhe çdo sjellje kundër saj e humb legjitimitetin dhe legalitetin qeverisës”, ka shkruar tutje ai.
Haradinaj thotë që Kushtetuta është shkruar mbi parimet më të larta të njerëzimit, duke lartësuar të drejtat e njeriut, garantimin dhe mbrojtjen e të drejtave të pakicave.
Tutje, ai ka thënë se Kushtetuta e Kosovës mbron demokracinë vibrante, kontrollin dhe balancin e pushteteve, ekonominë e tregut të lirë dhe sundimin e ligjit.
“Kjo Kushtetutë është motori i demokracisë dhe zhvillimit por edhe mburojë e fuqishme ndaj çdokujt që rrezikon sistemin tonë me apetite të autokracisë”, ka thënë i pari i AAK-së përmes një postimi në Facebook. /teve1.info/
