Kryetari i AAK-së, Ramush Haradinaj thotë se sanksionet e BE-së ndaj Kosovës, e dëshmojnë sa e pashpresë është gjendja.
Sipas tij, kjo do vazhdojë të përkeqsohet edhe më shumë, përcjell teve1.info
“I vetëdijshëm se Kosova me këtë kryeministër po hyn në një rrugë pa krye, para pak ditësh kërkova mocion për shkarkimin e Albin Kurtit. Sanksionet e BE-së ndaj Kosovës dhe paralajmërimet e SHBA-së se Qeveria e Kosovës është në rrugë të gabuar, e dëshmojnë se sa e rrezikshme dhe e pashpresë është gjendja, e cila fatkeqësisht do të shkojë duke u përkeqësuar gjithnjë e më shumë”, ka shkruar ai në Facebook.
Ish-kryeministri Haradinaj theksoi se sot është koha që të bëhet mocioni për shkarkimin e Qeverisë.
“Prandaj sot është koha të veprohet dhe të bashkohen të gjithë ata që interes parësor e kanë Kosovën, qofshin në opozitë ose edhe deputetë të shumicës, e ta jetësojnë mocionin për shkarkimin e kësaj Qeverie. Hezitimi për të vepruar në kohë të një krize kaq të thellë e me pasoja të paimagjinueshme për vendin është bashkëfajësi”, ka shkruar Haradinaj.
Ai shtoi se “mocioni për shkarkimin e Albin Kurtit, sot është interes kombëtar!”. /Teve1.info/
