Kryetari i Aleancës për Ardhmërinë e Kosovës, Ramush Haradinaj sot ka bërë homazhe te varrezat e dëshmorëve në Gjilan, në kujtim e nderim të heronjëve, Rexhep Mala e Nuhi Berisha, në 40-vjetorin e rënies për liri.
Haradinaj, shkroi se Mala e Berisha, ishin vazhdimësi e përpjekjeve për çlirimin e vendit.
“Kodra e Trimave në Prishtinë mban këtë emër në saje të trimërisë, të guximit e të gatishmërisë për sakrificë të Rexhës e Nuhiut. Ata ishin vazhdimësi e përpjekjeve të shqiptarëve për çlirimin e atdheut”, ka shkruar Haradinaj.
Ai tutje ka shtuar se jeta e vepra e tyre është pasuri për historinë e Kosovës, poashtu paralajmërues të Ushtrisë Çlirimtare të Kosovës për liri.
“Këto dy figura të ndritura, ishin përveç motiv për vazhdimësi dhe organizime të tjera e të shumta, ishin edhe paralajmëruesit e Ushtrisë Çlirimtare të Kosovës e cila e solli lirinë. Emrat e tyre si dhe jeta e vepra e tyre, është pasuri për historinë tonë të lavdishme!”, shkroi Haradinaj.
Ai ka vizituar bashkë me kolegët e tij, kazermën e Ushtrisë së Kosovës në Gjilan.
“Gjithashtu vizituam kazermën e Ushtrisë së Kosovës në Gjilan, ku u njoftuam me punën dhe të arriturat e ushtrisë sonë. Të impresionuar, me energjinë e vitalitetin që posedon ushtria jonë! Të motivuar nga trimëria dhe guximi i heronjve si; Nuhiu e Rexhepi dhe e kaluara e lavdishme e Ushtrisë Çlirimtare të Kosovës”, ka shkruar Haradinaj në Facebook./teve1.info/
