Kryetari i AAK-së, Ramush Haradinaj ka kërkuar që kryeministri, Albin Kurti të reagojë pasi që ish-asamblisti i VV-së në Prishtinë, Besnik Mujeci është arrestuar për kontrabandim të drogës.
Ai i ka drejtuar edhe një pyetje duke i thënë se a është me prokurorin a me Mujecin?.
“Albin, a je me prokurorin a me Mujecin?Bëhu i gjallë!”, ka shkruar Haradinaj në Facebook.
Ndryshe, dje Lëvizja Vetëvendosje e ka përjashtuar asamblistin, Besnik Mujeci, i cili u arrestua në Shqipëri nën dyshimin për trafikim droge.
Këtë ka bërë të ditur Sekretari Organizativ i VV-së, Alim Rama, përcjell teve1.info.
“Pas marrjes së informacionit për arrestimin e asambleistit të Komunës së Prishtinës nga radhët e subjektit tonë, Komisionin Diciplinor i LVV menjëherë ka trajtuar këtë rast. Si rrjedhojë Komisioni Diciplinor i Lëvizjes VETËVENDOSJE! në mbledhjen e tij mori vendim për përjashtimin e anëtarit Besnik Mujeci nga anëtarësia dhe të gjitha strukturat e Lëvizjes VETËVENDOSJE!”, ka shkruar Rama në Facebook.
Njëherit, ka shtuar se VV mbetet e përkushtuar që dukuritë e tilla do të jenë absolutisht të patolerueshme dhe të ndëshkuara.
Mediat në Shqipëri njoftuan gjatë ditës së djeshme për një aksion të madh policor në Shqipëri ku u arrestuan pesë persona, mes tyre edhe Besnik Mujeci.
