Anëtari i Kryesisë së Aleancës, Daut Haradinaj ka akuzuar kryeministrin në detyrë, Albin Kurti se po tenton ta shpërbëjë Republikën e Kosovës.
“Albin Kurti e ka problem të madh Republikën e 17 shkurtit 2008, andaj po e sulmon dhe po synon ta shpërbëjë. Republika e Kosovës nuk është laborator eksperimental i kuzhinave të kuqe, as për ikjen e fshehjen tënde nga Marrëveshja e Ohrit dhe e Brukselit”, shkroi ai.
Haradinaj përmendi edhe shkeljet e Kushtetutës, ligjeve dhe rregullave të demokracisë parlamentare, që sipas tij, po i bën Kurti dhe partia e tij.
“Shkeljet e vazhdueshme të Kushtetutës dhe ligjeve, politikat meskine e mashtrimet publike dhe, së fundmi, edhe shantazhet ndaj rregullave të demokracisë parlamentare dhe opozitës, janë dëshmi e mjaftueshme për ta kuptuar se çka po synon ky grup njerëzish të arrijë”, u shpreh Haradinaj.
Ai i kërkoi Kurtit të mos e dërgojë vendin drejt rrugëve të panjohura.
“Albin, Republika është mbi ty e secilin prej nesh. Mjaft me politika meskine që e dëmtojnë shtetin. Mos e sjell Kosovën në të panjohura, se të gjithë njihemi mes vete”, përfundoi Haradinaj shkrimin e tij.
