Kryetari i AAK-së, Ramush Haradinaj ka komentuar deklaratat e kryeministrit, Albin Kurti pas arrestimit të drejtorit të KEK-ut, Nagip Krasniqi.
Haradinajt thotë se Kurti gabon rëndë “kur i jep të drejtë vetes për t’i gjykuar veprimet ne një prokurori”, përcjell teve1.info
Sipas tij, gjuha e përdorur nga Kurti sot në Kuvend është me pasoja të rënda për shtetin dhe drejtësinë.
“Ndarja e pushteteve është themeli i funksionimit të sistemit demokratik të një shteti. Kur pushteti e sulmon sistemin gjyqësor të vendit të vet, ai pushtet e ka një problem serioz. Kryeministri gabon rëndë kur i jep të drejtë vetes për t’i gjykuar veprimet e një prokurori, edhe nëse ai ka dyshime për punën e tij. Ai rrëshqet në diktaturë kur thotë se një person nuk do të mund të bëhet kryeprokuror sepse kjo është kundër dëshirës së tij. Vendosja e një kryeprokurori nuk bëhet sipas dëshirave të kryeministrit. Të paktën jo në sistemin tonë të drejtësisë! Kam frikë se diskursi i kryeministrit i shpërfaqur sot në foltoren e Kuvendit të Kosovës është jo vetëm i gabueshëm, por edhe me pasoja të rënda për shtetin e për drejtësinë”, ka shkruar ai në Facebook.
Ish-kryeministri Haradinaj vlerëson se Kurti duhet të distancohet nga sulmet që po i bëhen prokurorisë.
“Prandaj, sot kam kërkuar që kryeministri dhe njerëzit e pushtetit të tij të vendosen në anën e drejtësisë e jo kundër saj. Ai duhet distancohet nga sulmet e parreshtura që po i bëhen prokurorisë dhe ta lërë drejtësinë ta bëjë punën e vet! Në të kundërtën, ai do të shndërrohet në sinonim të një kryeministri autoritar dhe gjithë pasojat do t’i bartë ai vet!”, ka shtuar ai.
Në seancën e sotme në Kuvend, Kurti ka thënë se edhe në të kaluarën ka pasur keqpërdorime në KEK, por nuk janë trajtuar nga prokuroria.
Siç ka deklaruar ai, udhëheqësia e re e KEK-ut pas marrjes së detyrës, ka deponuar fakte dhe dëshmi për keqpërdorimet që kanë ndodhur më parë, “por zelli i prokurorisë për tu marrë me çështjen ka qenë zero”. /Teve1.info/
